Prostat vəzinin xoşxassəli böyüməsinin dərmanla və ya cərrahi yolla müalicəsi

Prostat vəzinin xoşxassəli böyüməsinin müalicəsi dərman və cərrahi olaraq 2 yerə bölünür. 

Dərman müalicəsi xəstələrin 90%-də uğur əldə etmiş olur. Əgər xəstəlik artıq orqanizmə zərər verirsə və yaxud da dərman effektsiz qalırsa və yaxud da ki, xəstə dərman istifadəsindən imtina edirsə, bu zaman cərrahi əməliyyat qərarı verilir. Qalan xəstələrin hamısına dərman müalicəsi verilir. 

Dərman müalicəsi gündə 1 dəfə qəbul etməklə, maddi olaraq ucuz olduğu üçün demək olar ki, ilkin seçimimizdir. Artıq hansı xəstələrdə ki, effekt vermirsə, hansı xəstələrdə ki, xəstələr müalicədən imtina edirsə və yaxud da xəstəlik orqanizmə zərər verirsə, 5 mütləq, 2 nisbi göstərişdən biri varsa, bu zaman cərrahi əməliyyat qərarı verilir. 

Prostat vəzinin ölçüsünə, prostat vəzin orqanizmə verdiyi zərərlərə görə cərrahi əməliyyatın növü təyin edilir. Əməliyyatların böyük əksəriyyəti – bəlkə də 70-80%-i qapalı yolla həll olunur, geri qalan xəstələr isə açıq əməliyyatla bu xəstəlikdən qurtula bilirlər. Əməliyyat növünün seçilməsi xəstənin yanaşı xəstəliklərindən, xəstənin prostatının həcmindən, və xəstənin istəyinə bağlı olaraq təyin edilir. 

Əməliyyat olunmuş xəstələr qapalı təyin olunmuşdursa, təqribən 2-3 gün, açıq əməliyyat olunubsa, 5-6 gün xəstəxana şəraitində qaldıqdan sonra evlərinə gedirlər. Xəstə evə çıxarkən əməliyyat vaxtı qoyduğumuz kateteri xaric edirik. Xəstə rahat bir şəkildə sidiyə çıxdıqdan sonra evə göndərilir. Evə çıxmış xəstələr ortalama 1 həftə bərpa dövrü keçirir, sonra isə aktiv həyat fəaliyyətinə davam edirlər. 

Xəstələrdə ilkin dövrlərdə tez-tez sidiyə çıxma, yandırma kimi hisslər olmasına baxmayaraq hər gün keçdikcə bu şikayətlər günbəgün azalır və 4-6 həftədən sonra bu şikayətlər tamamilə keçməlidir.

Xəstələr bəzən sual verirlər ki,

“Bu əməliyyat olunduqdan sonra xəstəlik yenidən geri qayıdarmı?”

Dünya statistikasına əsasən, bu əməliyyatdan sonra 5 il ərzində təkrarlanma ehtimalı 10% ətrafında, şəxsi təcrübəmizdə isə hər 100 xəstədən 1-də, ya 2-də görülməkdədir. 

Prostat vəzinin xoşxassəli böyüməsinin əlamətləri, tez-tez sidiyə çıxma, sidikdə yandırma, sidiyin sonunda damlama, sidiyini tam boşaltmama hissi, gecə 1 dəfədən artıq sidiyə durma kimi əlamətlər varsa, hökmən həkimə müraciət etmələrini tövsiyə edirəm. Çünki vaxtında müraciət etmədikdə prostat vəzin xoşxassəli böyüməsi artıq yanaşı fəsadlarla ki, bunlardan – böyrək çatışmazlığı, sidik kisəsinin daşı, sidik kisəsinin yırtığı, prostata bağlı qanaxma kimi ciddi fəsadlar verir. Bu isə xəstənin həyatını təhlükəyə ata bilər və xəstəliyin vəziyyətini daha da ağırlaşdırmış olar.

Dr. Mansur Xəlilov, Baş Həkim – Uroloq-androloq